الله .. الوطن .. فاطمة

أفكس أنواع التواصل البشري

سـ : أيه أكتر حاجة بتخنقك ؟
جـ : الأسئلة الكتير .
سـ : أيه أكتر سؤال بيخنق عليك ؟
جـ : هتعمل أيه النهاردة .
سـ : علل !! يعني بم تفسر علشان أعذرك ؟
جـ : ببق هعمل حاجات كتير بس غالبًا معرفش أيه اللي فيهم مهم بالنسبة لك علشان اقوله واختصر ، ضيف لده ان معنديش  أفعال تفضيل في حياتي ، ف كل حاجة عندي أسمها حاجات … وساعات ببق منهك ومش قادر اتكلم فبوفر طاقة .
سـ : وليه بتحاول توفر طاقتك .. ما تنفقها ؟
جـ : وانفقها ليه !!؟  انا مجرد بني ادم ، مش مخلوق “إنرجايجر” ، وعارف إن فاعليتي استحالة تدوم مدي الحياة .
سـ : تفتكر لو ان الانسان مكنش بيتكلم كان بقه أحسن ؟
جـ : أكتفي بهز رأسه فيما معناه ” أكيد يا ملك الحديد .. بتحكي في أيه “
سـ : بما أنك راجل علي قديمه ؛ ممكن اسألك ساعتها البشرية كانت هتتواصل مع بعض أزاي ؟
جـ : بالصورة والأشارة .. وده في حد ذاته أرقي وأسلم وأكثر تحديد ، وبعدين مين قال اننا ناجحين في التواصل؟ .. انا شخصيًا معرفوش .. لكن أظن أنه ذات الشخص اللي أخترع صاعق الناموس .. واللي انا برضه معرفوش . بالمناسبة أنا ماما عندها صاعق ناموس .
سـ : طيب ممكن حضرتك تتخيل لنا شكل الحياة كان هيكون عامل أزاي وقتها ؟
جـ : أولاً : مكنتش هتسمع موسيقي أشتراوس ، ثانيًا : كان كل واحد بيكتب شعر بالعامية كان هيقتنع ان السواد الاعظم من الجمهور هيقراء القصيدة ومش هيسمعها ملقاة ، في واحد كتب شطر بيقول فيه ” بازاك وازاك كأني بازك زكة الأولي ” رغم ان القصيدة في مجملها جيدة لكن الشطر ده تحديدًا - كمثال - محتاج أداء حركي مش بس القاء صوتي .
سـ : بالرغم من انك متحامل بعض الشئ ، لكن في حاجات تانية تستحق الذكر ؟
جـ : أيوه انا متحامل ، ليك شوق في حاجة ؟
سـ : لا ابدًا اتفضل .
جـ : خلاص انا اتخانقت من الموضوع ده ، بس علي كل حال مكنش هيبق فيه تلفونات وبالأخص الموبايل ، وبالتالي مكنتش هتسمع السؤال العبثي : أيوه يا عم انت فين دلوقتي ؟ ” ، تخيل انا احيانًا برد علي تلفون البيت ، باتصدم بنفس السؤال .
سـ : وبتعمل ايه ساعتها ؟
جـ : بأقفل الخط .
سـ : هل ممكن تقضي يوم من غير ما تكلم ؟
جـ : أه عادي يعني .. انا بحب الفرجة . وبعدين مرة نمت تلات ايام متصلين ومعلوماتي بتقول اني مبكلمش وانا نايم ، ولما صحيت حسيت ان معنديش اي رغبة في الكلام خالص .
سـ : حضرتك ناوي تعمل ايه بعد متخلص معايا الحوار ده ؟
جـ : ليه ؟
سـ : مفيش عايز بس اطمن عليك اصلي حاسس انك مخنوق شوية ؟
جـ : تطمن علي !؟ ، قوم يا ابن المضايقه  يلعن أبو اللي جابك .. عيل سيس .